جميع برامج الاضاءة لطيور التسمين-مهندس عاطف عبد الدايم

Abu Jumana

"مهندس عاطف عبد الدايم التطهير" "مهندس عاطف عبد الدايم علاج الاي بي" "مهندس عاطف عبد الدايم اعشاب" "مهندس عاطف عبد الدايم اعلاف" "مهندس عاطف عبد الدايم ذرة" "مهندس عاطف عبد الدايم الاضاءة" "مهندس عاطف عبد الدايم تطهير" "مهندس عاطف عبد الدايم معلومات وخبرات حقلية فى مجال الدواجن" "المهندس عاطف عبد الدايم تنظيف المزرعة" "منتدى المهندس عاطف عبد الدايم تطهير المزرعة" "بوستات المهندس عاطف عبد الدايم" "تجارب المهندس عاطف عبد الدايم الحقلية"

اهمية الاضاءة للدواجن في طيور التسمين - مهندس عاطف عبد الدايم

* تخلى الطير يهضم
*بتقلل من النافق الطبيعى
* علاج هام لحالة الموت المفاجئ خاصة فى السلالات الثقيلة مثل الهبرد والكوب
* بتحسن من التحويل
*لها دور فى انخفاض حالة التلبكات المعوية اللى بتعمل اسهال بنى فى اول العمر
*تعمل على زيادة الوزن عن طريق عدم فقد الطاقة بسبب النشاط والحركة
*بيقلل مشاكل تعب الارجل
*سبب اساسى فى تقليل الاستسقاء
* تحسن فى وظائف الكبد والكلى
شروط هامة علشان اى برنامج اضاءة يجيب فايدتة
منها
* لازم وقت الاظلام يكون اظلام دامس من كل النواحى
يعنى تجنب انك تشغل لمبة قريبة من العنبر وتخرب الاظلام مثل لمبة غرفة الخدمة او حتى عامود الانارة الموجود فى الشارع او اى وسيلة تنور وقت الاظلام
* لا تبدا برنامج الاظلام قبل تمام نضج الامعاء يعنى من بعد اليوم السادس من العمر
* علشان تعمل برنامج اضاءة ومش يكون لة اثر سلبى خاصة تفاوت فى الاحجام فلازم تكون مجهز عدد علافات وسقايات مناسبة لعدد الطيور علشان ميحصلش تزاحم على العلف والقوى اللى ياخد راحتة فى الاكل والضعيف لا
* احرض على عدم اهمال التهوية وقت الاظلام
*احرض على توزيع جيد للمبات الاضاءة فى جميع انحاء العنبر
* التنظيف الجيد للمبات الاضاءة من الاتربة

فية اكثر من برنامج مقترح للاضاءة وبيتوقف على السلالة والمنطقة

هنذكر منها ما يلى

البرنامج الاول

اظلام 6 ساعات متفرقة اثناء الليل بيكون 2 ساعة بعد المغرب

2 ساعة وسط الليل

2 ساعة وقت الفجر

البرنامج التانى

البرنامج المتقطع

اظلام ساعة وانارة 3 ساعات

البرنامج الثالث

اظلام ساعتين وقت المغرب فقط

البرنامج الرابع

من اليوم الاول الى الرابع ساعة بدون اضلام

من 4 الى 7 يوم ساعة واحدة اظلام

من 7 الى 14 يوم 4 ساعات اظلام

من 14 الى 30 يوم 8 ساعات اظلام

من 30 الى 35 يوم 3 ساعات اظلام

من 35 يوم الى اخر الدورة 1ساعة اظلام

مع تحياتى وشكرا

مهندس عاطف عبد الدايم

------------------------------------------

قوانيين عامة خاصة بالاضاءة-مهندس عاطف عبد الدايم

* هل تعلم ان شدة الاضاءة لها تاثير على الوزن والتحويل
فعندك مثلا شدة اضاءة 10.8 لوكس تعمل وزن او تحويل افضل عن شدة اضاءة 20 لوكس
ودا راجع لتاثير الاضاءة على الغدة النخامية اللى فى المخ ولها دور فى عمليات كتير فى الجسم ووعند الشدة دى بتقل فقدان الطاقة من الجسم يعنى كل طاقة العلف رايحة على تكوين اللحم
كمان بيقل الافتراس
*هل تعلم ان الوحدة المنبعثة من اى لمبة اسمها ليومنز يعنى علشان اقيس شدة الاضاءة للمبة معينة اشوف بتعطى كم ليومنز
* هل تعلم ان تنظيف اللمبات من الاتربة لها دور فى شدة الاضاءة يعنى بتستفيد من كل شدة الاضاءة اللى جاية من اللمبة
* هل تعلم ان توزيع الاضاءة بصورة هندسية علمية لة دور فى تحسين التحويل وجودة الرعاية ولها دور فى تقليل السردة
فعندك مثلا بعض الامور الفنية لتوزيع اللمبات
1) يجب تثبيت اللمبات فى صفوف واعمدة ويكون الفرق بين اللمبة والاخرى متساوية فى كل الصف
2 ) المسافة بين صف اللمبات اللى جانب الجدار والجدار نفسة لا يزيد عن المسافة بين اللمية وراس الطير اما تساويها او تقل عنها قليلا ومن الخبرات الحقلية انها تقل افضل علشان امتصاص الجدار لجزء من الاضاءة دى
3) المسافة بين الصفوف بتاعة اللمبات او بين اللمبات وبعضها يقدر ب 1.5 مرة بين اللمبة وبين الطير ومن الخبرات الحقلية انها لو وصلت المسافة دى الى 2 مرة بيكون تحويل اقل
* هل تعلم ان 2 ليومنز تعمل انبعاث اضاءة يكفى مساحة 0.09 متر مربع علشان نوصل لشدة اضاءة 10.8 لوكس
وخلى بالك من المعلومة الاخيرة دى لاننا هنحتاجها واحنا بنتعلم ازاى نصمم شدة الاضاءة اللى تعمل افضل تحويل

مع تحياتى وشكرا

مهندس عاطف عبد الدايم

----------------------------------------------

نزلنا قبل كدا معادلات لو جمعناها مع بعض تمكنك من ادارة قطيعك حتى وانت بعيد عن مزرعتك

فقلنا ازاى تعرف قطيعك باكل كم شيكارة علف فى اليوم للناس اللى بتاكل علف جاهز

وقلنا ولو بتصنع علفك نزلنا لو معادلة تعرفك استهلاكك

ومعادلة مية التحصين

ومعادلة استهلاك المية صيفا وشتاء

ومعادلة التهوية سواء بالحد الادنى للتهوية او التهوية طوال الدورة

ومعادلة حساب المرواح باكثر من طريقة ومعادلة خلايا التبريد باكثر من طريقة

بقالكم عندى

معادلة واحدة فقط

وهى حساب عدد اللمبات فى العنبر

طبعا بمعرفة انت عاوز لقطيعك كم لوكس يعنى مثلا

فى البياض بيبدا برنامج الاضاءة ب25 او 30 لوكس على حسب السلالة

وبنبدا نخفض اللوكس على حسب برنامج الاضاءة الى ان يصل الى 5 الى 10 لكس

وفى التسمين

ناس بتحب تشتغل على 30 لوكس طوال الدورة

وناس بتقول لا دى ممكن تعمل افتراس فالافضل ننشتغل على 20 لوكس فقط

وانا شخصيا بفضل بالبداية ب30 لوكس الى وصول لاعلى وزن فى الاسبوع الاول وبعدين نكمل الدورة ب20 لوكس والنص الاخير من الدورة 10 الى 15 لوكس

المهم تحديد هتشتغل بكم لوكس فى الدورة سواء بياض او امهات او تسمين

وخلينا نكتب المعادلة اللى هتتماشى مع جميع مجالات الدواجن

...........................................مساحة العنبر بالمتر المربع * اقصى عدد لوكس مطلوب

عدد اللمبات فى العنبر تساوى = ------------------------------------------------------

..........................................قوة اللمبة بالوات * معدل ثابت ك

طيب هنفسر كل معطى لوحدة

مساحة العنبر معروفة يعنى عنبر عرضة 12 فى طول 60 هيكون مساحتة 720 مترمربع

اقصى عدد ودى وضحناها فوق يعنى لو عندك تسمين واقصى لوكس 30 وبعدين تخفضة علشان الافتراس فاحسب على 30 لوكس

قوة اللمبة التنجستين المعروفة اما 40 او 60 او 100 وات

اما معدل ك دا بيحدد على حسب قوة الوات

يعنى فى اللبمات ال40 وات يكون المعامل 4.6

لو هتشتغل ب60 وات بالمعامل هيكون 5

لو هتشتغل ب100 وات هيكون المعامل 6

طبعا لو هتشتغل باللبمات الفلوروسينت البياض دى وانا طبعا لا افضلها

احسب الواحدة بقوة 3 من اللمبة ال60

نعطى مثال

عنبر طولة 12

عرضة 60

هيشتغل تسمين فاللوكس هبدا ب 30

هنركب فية لمبات 60 وات

هيكون المعامل 5

عدد اللمبات فية = (720 * 30 ) / (60 *5)

يعنى 72 لمبة

اللهم اجعل عملنا هذا خالص لوجهك الكريم

مع تحياتى وشكرا

مهندس عاطف عبد الدايم

---------------------------------------------------

كتير اتكلمنا عن برنامج الاضاءة

وتلاقى ناس مطبقاة وعامل نتايج كويسة جدا

وناس مطبقاة وعامل نتايج اقل

بل ممكن تطبق برنامج اضاءة لعنبرين متجاورين وتلاقى عنبر متفوق عن الاخر

مع ان كل المعاملات واحدة

طيب فية حاجات بترفع من قيمة اى برنامج اضاءة

وبتخلى الاستفادة منة اعلى ما يمكن

والكلام دا مناسب لجميع السلالات

اولا اول يوم او حتى اول 3 ايام سيب الاضاءة 24 ساعة

طبق البرنامج بالتدريج

يعنى اطفى ساعة من تانى بوم

وزود ساعات الاظلام تدريجى الى ان تصل لوزن 160 جرام

وعند الوزن دا بيكون الجهاز الهضمى وبطانتة وخاصة الخملات

شبة مكتمل

قبل كدا التطبيق الكلى لكامل برنامج الاضاءة مش هيعطى فايدة عالية

علشان كدا بنقول اعمل تدريج طول ما بطانة الجهاز الهضمى غير مكتملة

النقطة دى هى الفيصل اللى بيخلى برنامج يعمل نتايج افضل من برنامج اخر دا طبعا لما تكون كل الشروط مطبقة

يعنى لو هتعمل اظلام 6 ساعات

هيكون البرنامج كالاتى

اول يوم 24 ساعة

اليوم التانى اظلام ساعة

الثالث 2 ساعة

الرابع اظلام 3 ساعات

الخامس اظلام 4 ساعات السادس اظلام 5 ساعات

ونبدا نوزن ونشوف هل وصلنا للمتوسط اللى بيكتمل فية الخملات (160 جرام )

لو وصلنا لية طبق ال6 ساعات متوزعة على الليل

لو لسة موصلتش اعمل تدريج فى الاظلام لغاية لما توصل للوزن دا

طبعا الكلام دا بجانب الاساسيات المعروفة من شدة اضاءة وتوزيعها وكمية اللوكس اللى عاوزينها واللى اتكلمنها فيها فى بوستات كتير

يعنى تقيد بوزن 160 جرام وهتلاقى البرنامج عمل معاك افضل نتيجة

اللهم اجعل عملنا هذا خالص لوجهك الكريم

مع تحياتى وشكرا

مهندس عاطف عبد الدايم

-----------------------------------------------------

تكلمنا كتير عن برامج الاضاءة وصممنا اكثر من برنامج اضاءة

لاكن اية اللى هيعود علينا من برنامج الاضاءة

شوف يا سيدى

اولا برنامج الاضاءة بيقلل من النفوق الطبيعى اللى سببة زيادة التحويل الغذائى واللى سببة توقف القلب

ثانيا الاظلام بيساعد او بيقلل من ظاهرة الاستسقاء اللى سببها وراثى

ثالثا بيقلل من النافق اللى سببة امتلاء سوائل البطن

رابعا بيقلل النافق اللى سببة ظاهرة الموت المفاجئ sudden death syndrome

خامسا فية دراسات وتجارب حقلية بتقول ان ساعات الاظلام قللت من مشاكل الارجل وبعض التقزم اللى سببة سؤء التحويل

سادسا الميلاتونين بيزيد فى ساعات الاظلام يعنى بيعمل على زيادة المناعة

سابعا انزيم الفوسفاتيز بيتزيد مع برنامج الاضاءة يعنى قلة ظاهرة العرج وتحسن فى الهيكل العظمى

اللى هيعرف يشيل الهيكل اللحمى

ثامنا مقارنة بين دورات طبق فيها برنامج اضاءة ودورات شغالة 24 ساعة اضاءة لوحظ ان

اللى بنعمل فيها اظلام تحويها العذائى اعلى ووزنها اكبر من اللى من غير برنامجج

دى فوايد برنامج الاضاءة والبرامج كتير وقلناها قبل كدا فى اكثر من بوست

لاكن امتى نبدا برنامج الاضاءة علشان ناخد افضل استفادة منة

هنقول قانون عام مشهور وس علماء الدواجن

القانون بيقول ان افضل وقت لتعرض طير التسمين للاظلام هو لما يكون وزنة 4 اضعاف وزنة عمر يوم

يعنى كتكوت وزنة عمر يوم 40 جرام ابدا البرنامج بتاعك لما يكون وزنة 160 جرام يعتى تقريبا عمر 7 ايام

ولو وزنت على عمر 7 ايام ولقيت الطير متاخر عن وزنة اجل البرنامج لغاية لما توصل للوزن دا

طبعا من خلال الخبرات الحقلية

اننا ممكن ناخر البرنامج فعلا لما الوزن يوصل 4 اضعاف عمر يوم بس بلاش توصلة لاقصى ساعات اظلام على طول

يعنى ممكن نمهد بساعة اظلام بعد انتهاء اليوم الثالث من العمر علشان التعود

وبعد الوصول للوزن المرجو ابدا برنامجك

مع تحياتى وشكرا

مهندس عاطف عبد الدايم

-------------------------------------------------------

طيب تعالو نستعرض تجربة اتعملت على مزرعتين

مزرعة شغالة 23 ساعة انارة

والاخرى شغالة 19 ساعة

كانت النتيجة ولدورتين ورا بعض نفس النتايج

طبعا كل اللى جاى دا لصالح اضاءة 19 ساعة

** انخفاض معدل التحويل الغذائى فى المزرعة 19 ساعة يعنىى علف اقل بنفس كمية اللحم

* نقص ملحوظ فى النفوق الطبيعى خاصة اللى سببة قصور فى عضلة القلب يعنى اللى بيكون فية الطير الكبير والكويس يتنظظ ويرفرف لغاية لما يموت وعند التشريح متلاقيش اى اعراض تشريحية واضحة

دا قل جدا

* قل الاجهاد وانتو عارفين ان اجهاد معناة ميول اسرع للاصابة بالامراض

* قلة ملحوظة فى العرج الطبيعى وليس المرضى

* انخفاض واضح جدا بل يكاد يكون معدوم من ظهور اى حالات استسقاء سواء فى العمر الكبير او الصغير

* قلة هدر العلف بطريقة ملحوظة جدا

* معدل نمو افضل مع زيادة فى الوزن عن اللى متنورة 23 ساعة وعلى علف اقل

* فى شغل المجزر قلة المستبعد جدا من قبل المجزر للمزرعة اللى منورة 19 ساعة

* تحسن عالى جدا فى جودة الذبيحة وتحسن طعم اللحم ودا سببة معروف ان الجسم اخد راحتة فى الهضم وبالتالى رص الميوسين والببتيد بيكون اجود واكفا

** ملحوظ جدا فى المزرعة بتاعة 19 ساعة دى قوة فى الارجل ودى بتفيد اثناء التحميل والمسك والتعليق فى المجزر انها بتتحمل

** تحسن واضح فى الهضم يعنى علف غير مهضوم اقل من الطبيعى نظرا لبقاء الكتلة الغذائية مدة اطول اثناء الاظلام

** اداء عالى جدا لجميع اعضاء الجسم بسبب زيادة افراز الميلاتونين

وطبعا معروف ان الهرمون دا بيفرز اكثر اثناء الاظلام

على فكرة يا جماعة كل نقطة من اللى فاتو عليها تجربة لوحدها بس حبينا نجيب الخلاصة ونجمعهم فى موضوع لوحدة

ملحوظة مهمة المزرعة اللى منورة 19 ساعة لازم اول اسوبع يكون انارة 23 ساعة وشدة اضاءة 20 لوكسميتر وبعدها نتقيد ب19 ساعة

كمان احنا بنقارن بين اضاءة 23 ساعة واضاءة 19 ساعة

فما بالك باللى بيشتغل 24 ساعة اضاءة يعنى حارم نفسة وقطيعة من فوايد كتير جدا

مع تحياتى وشكرا

مهندس عاطف عبد الدايم

---------------------------------------------------------------------------

هل للون الاضاءة فى الدواجن تاثيرات مناعية

يجيب على السؤال

احدى الشركات الصينية المختصة فى تصميم الاضاءة فى عنابر الدواجن الحديثة واللى بتروج لمنتجاتها هنا بالخليج وعملو ندوة علمية عن شغلهم

الناس دى بتقول

الاتى

هات عينة دجاج وليكن 100 طير

معرضين لنفس الظروف من كل شى تغذية ورعاية وحظيرة ومعاملات

لكن فقط المختلف هو

دجاج اضاءتة لمبات حمرا

الاخرى بيضا

التالثة زرقا

الاخيرة خضراء

وكانت النتايج كالاتى

الدجاج اللى اضاءتة خضرا سجل على T lymphocytes يلية الازرق

وكانت على الترتيب 85% للاخضر

و 76% للازرق

فى حين ان الاضاءة الحمرا والبياض لم تتعدى ال54%

وايضا لوحظ ان الزيادة المناعية او ما يسمى الاستجابة المناعية كان اعلى معدها فى الاضاءة الزرقاء عن الاضاءة الحمرا او البياضا

اخذو تحصينة النيوكاسل بالتحديد علشان يشوفو الاجسام المناعية الناتجة من التحصين

وجد ان اللون الاخضر اعلى اجسام مضادة للنيوكاسل عن الباقى

لكن باقى الالوان تقريبا زى بعض فى الاستجابة المناعية للنيوكاسل

فقط الاخضر اللى تفوق

واتعمل اكثر من تجربة على الخلايا والاجسام المناعية

خلاصتها تفوق اللون الاخضر والازرق على الابيض والاحمر

دا على مستوى المناعة

سيبك من الصنيين دول

تعالى نشوف هل فية تاثير على الوزن

هقولك ايوة

ان التعرض للضوء الاخضر او الازرق او الخلط بينهم عمل زيادة فى الوزن عن الالوان اللى غالبية الناس شغالة بيها ( الاحمر والابيض)

ودى غالبية الانظمة الحديثة عارفينها

طيب خد الثقيلة دى

العنابر اللى اضائتها خضرا

لوحظ ان عضلات الصدر والورك بنمو اسرع فى العمر الصغير على عكس الطبيعى

حتى فى الدجاج العجوز فى التربية المنزلية واللى نموة بطئ جدا

لو اتعرض للضوء الاورق بينشط النمو فية عن الطبيعى ودا تجربة اتعملت لناس كتيرة جدا على مستوى القرية

حتى فى السمان

الازرق والاخضر بيعمل وزن وتحويل افضل من الاحمر والابيض

يعنى خلاصة القول

عاوز مناعة اخضر او ازرق

عاوز وزن اخضر او ازرق

مع اننا ماشين بطريقة وجدنا اباءنا كذالك يفعلون فجميع مزراعنا اما ابيض او احمر

اللهم اجعل عملنا هذا خالص لوجهك الكريم

مع تحياتى وشكرا

مهندس عاطف عبد الدايم

---------------------------------------------------------------

هل لبرنامج الاضاءة دور فى المناعة

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

بعد التطور فى السلالات وسرعة نموها طبيعى ان سرعة النمو دى تيجى على حساب المناعة خاصة المناعة المعوية

فلما بنريح الجهاز الهضمى شوية بنعطيى فرصة للخلايا المناعية المنتشرة بطول القناة الهضمية انها تشتغل

دا اولا

كمان اعطاء ساعات اظلام بيزيد من افراز هرمون الميلاتونين اللى هو مجفز جيد جدا للجهاز المناعى

وبيقلل من هرموات الكورتيكوستيرون اللى بتقلل شغل الجهاز المناعى

ووجد ان تتر كتير من التحصينات بصفة عامة والتحصينات المعوية بصفة خاصة اعلى فى الدورات اللى اطبق فيها برنامج اضاءة

اعلى من الدورات اللى كانت منورة 24 ساعة

وانا ارى ان افضل برنامج هو 6 ساعات اظلام

2 فى اول الليل

2 وسط الليل

2 عند الفجر

ابدا البرنامج بعد اليوم السابع

يعنى اول 3 ايام اضاءة 24 ساعة

واليوم الرابع ساعة اظلام

الخامس زود ساعة

السادس زود كمان ساعة

السابع كمان ساعة

وبداية من اليوم الثامن طبق البرنامج اللى كتبناة فوق

اللهم اجعل عملنا هذا خالص لوجهك الكريم

مع تحياتى وشكرا

مهندس عاطف عبد الدايم

----------------------------------------------------------------------------

اخى المربى

هل تعلم ان عدم انتظام الاضاءة لها دور فعال فى نشاط الكوكسيديا

هتقولى ازاى ؟؟

لما بيكون لمبة محروفة وانت مش بتبدلها

او حتى مغطيها الغبار

بتقلل شدة الاضاءة

وبتعمل عدم توزيع منتظم للطيور لان الطيور هتروح على الاضاءة العالية او المبات المنورة

فهيحصل خلل فى توزيع الطيور ومعرف ان كل ما ذادت عدد الكيلوجرامات اللى بيشيلها المتر المربع من الفرشة عن الطبيعى بتزيد رطوبة الفرشة

ومع استمرار المشكلة وزيادة الرطوبة تزيد معاها الكوكسيديا

فاحرض اخى المربى على التوزيع المنتظم للمبات وغير اللى تتحرق ويكون فية تجانس فى توزيع اللمبات

مع تحياتى وشكرا

مهندس عاطف عبد الدايم

منقول للإفادة

المصدر

شاهد ايضا للمهندس عاطف عبد الدايم

"مهندس عاطف عبد الدايم التطهير"
"مهندس عاطف عبد الدايم علاج الاي بي"
"مهندس عاطف عبد الدايم اعشاب"
"مهندس عاطف عبد الدايم اعلاف"
"مهندس عاطف عبد الدايم ذرة"
"مهندس عاطف عبد الدايم الاضاءة"
"مهندس عاطف عبد الدايم تطهير"
"مهندس عاطف عبد الدايم معلومات وخبرات حقلية فى مجال الدواجن"
"المهندس عاطف عبد الدايم تنظيف المزرعة"
"منتدى المهندس عاطف عبد الدايم تطهير المزرعة"
"بوستات المهندس عاطف عبد الدايم"

"تجارب المهندس عاطف عبد الدايم الحقلية"

كوكب الطيور والحيوانات