شاهد بالتجربة علاج كثرة النمل في البيت

كلنا ملاحظين ان النمل حاليا بيغزو البيوت بصورة كبيرة جدا وبقى بيظهر بكميات رهيبة ,لدرجة ان الناس بدئت تشك في الموضوع ولو انت ساكن في الريف فهتلاقي كل الناس بيوتها مليانة نمل واعداد النمل اللي بتظهر حاليا اضعاف اعداد النمل اللي كانت بتظهر في بداية الصيف ,لدرجة ان في بعض الناس قالت ان السبب حسد او سحر وده لانهم كل ما يقتلوا النمل بيظهر تاني وبأعداد اكتر واكبر وده جعل الناس تستسلم للموضوع وتقول ان شكوكهم حقيقية والسبب هو حسد ,فما هو سبب كثرة النمل في المنزل هذة الايام وما هو العلاج المناسب للقضاء على النمل في المنزل بصورة سريعة.

اسباب كثرة النمل في البيت

لكن العلم له رأي تاني في الموضوع وسبب كثرة النمل في البيت وفي بالفعل اسباب علمية توضح الاسباب اللي جعلت النمل يظهر في هذة الفترة من العام بأعداد كبيرة في المنازل وكمان هنتكلم عن سبب رجوع النمل بأعداد اكبر كل ما كافحته او رشيت عليه مبيد وقتلته,كل ده هنعرفه في المقال ده.

تجربة علاج كثرة النمل في البيت

وبالتجربة هوريكم ازاي بخطوات بسيطة جدا هتنهي على وجود النمل في بيتك.

كلنا عارفين ان النمل هو عبارة عن مملكة كبيرة جدا بتنقسم لكذا قسم اولهم وعلى رأسهم الملكة وبعدها الشغالات والجنود اللي دورهم يحموا المملكة والملكة بالاخص.

الملكة بتاعتنا هي مربط الفرس او اهم عضو في موضوعنا واللي بيكون سبب انك من المستحيل القضاء على النمل في بيتك بسهولة
الملكة بتسكن العش ومش بتخرج منه نهائي وشغلها الوحيد هو وضع البيض.

بتقدر ملكة النمل انها تضع من الف لـــ 30 الف بيضة في اليوم وفي بعض انواع الملكات بتضع اكتر من 50 الف بيضة في اليوم الواحد

هل كثرة النمل في البيت سحر او حسد

لما بيظهر نمل في بيتك بيكون عبارة عن شغالات وعمال او جنود وشغلهم كله البحث عن طعام ورفعه وتوصيله للعش
في الايام العادية في الصيف بيكون شغل النمل توصيل الطعام للعش لتغذية الملكة واليرقات وعشان كدة انت بتشوف اعداد النمل عادية في بيتك او مطبخك ولو قتلته ممكن متشوفهوش بيظهر تاني بكثرة ,لكن في هذا الوقت من العام بيزيد اعداد النمل بصورة كبيرة والناس بتشك ان سبب ظهوره ممكن يكون حسد او سحر.

على ماذا يدل ظهور النمل بكثرة في البيت

لكن سبب انه كتير الايام دي وقبل بداية فصل الشتاء بفترة بسيطة هو انه المستعمرة بتشتغل على تخزين الطعام اللي هيكفيهم فترة الشتاء ولازم ينجزوا الامر خلال فترة بسيطة وقبل ما موسم البرد يدخل ولانهم مش هيقدروا يخرجوا بأعداد كبيرة زي الصيف وهيدخلوا في مرحلة الثبات الشتوي وكل الاكل اللي خزنوه الفترة دي هيكون غزائهم طول ال5 او 6 شهور الجايين.

لماذا يعود النمل في الظهور بكثرة بعد مكافحته

طيب نرجع لموضوعنا لية كل ما بنكافح النمل بيرجع يظهر تاني ؟؟ وبأعداد اكبر؟؟
السبب في كدة هو ان الملكة جوه العش بتبيض كل يوم الوفات من البيض فمهما انت قتلت في النمل فهناك مصنع شغال بينتج نمل وخلال ساعات هتلاقي الملكة بترسل جيش جديد للبحث عن الطعام.

العلاج النهائي والفعال لكثرة النمل في البيت

عشان تقضي على النمل بشكل نهائي وتقفل الملف ده للأبد يبقى لازم تقضي على الملكة نفسها ,يعني تقفل المصنع نفسه
وبيكون قدامك حلين مفيش ثالث ليهم
انك تقوم بوضع اكل مسموم ولما يحملوه للعش فمؤكد ان الملكة هتاكل منه وبكدة هيكون قضيت على المستعمرة بشكل نهائي
حمض البوريك او البوريك اسيد بتجيبه وتضيف عليه سكر وحليب وتعمل عجينة وقطع صغيرة جدا تحطها في اماكن تواجد النمل والحمض ده سام للنمل ,لما الشغالات هتاخده العش فأضمن ان المملكة كلها هيتم القضاء عليها.

حل اخر لعلاج كثرة النمل في البيت

الحل التاني هو انك تجيب نص ليمونة وتعصرها على شوية ماء وتسحبها بسرنجة وتراقب الشغالات لحد ما توصل للعش اللي بيدخلوه فيه.
احقن العش بالمركب كذا مرة وحاول انك تفتح العش كويس بحيث السائل يوصل لمكان الملكة ,وبكدة هتكون قضيت على مصنع النمل نفسه.
لكن لو فضلت ترش مبيد حشري على اي نمل يظهر قدامك فأنت محلتش المشكلة وخلال ساعات بسيطة الملكة هتبعت لك سرب تاني من النمل وبأعداد اكبر ومش هتخلص منهم. وبكدة هنكون عالجنا بالتجربة ظهور النمل بكثرة في المنزل والقضاء على النمل في البيت بشكل نهائي وللأبد.